•Kuruyu wa 4 niho hatanguye igikorwa co kwandika abazoja mu matora yo kwemeza canke guhakana ihinyanyurwa ry’ibwirizwa nshingiro. Aho twaciye mu ma komine ya hano mu gisagara ca Bujumbura kugera isaha 6 zirenga z’umurango abatari bake mu bazokora ico gikorwa bari bakiriko baratora ibikoresho. Uwujejwe amatora muri Mairie ya Bujumbura asigura ko uko gucerwa kwatewe nuko Mairie ya Bujumbura yahawe ivyo bikoresho ubwa nyuma.
Hagati mu gisagara ca Gitega, abantu 50 nibo bari bamaze kwiyandikisha nk’igihe c’isaha 6 ku kibanza kimwe kimwe mu bibanza bine, arivyo Ecofo Yoba, Magarama ya mbere, Ecofo de la paix hamwe na Magarama ya gatatu. Ngo nta tunenge twibonekeje mu bijanye n’ibikoresho n’abakozi bandika bari bakwiye.
Mu murwi w’igihugu ujejwe gutegura amatora Ceni bamenyesha ko biteze abantu barenga imiliyoni 4 bazokwiyandikisha. Prosper Ntahorwamiye avugira uwo murwi avuga ko mu ntara ya Ngozi ariho hibonekeje umwe mu bajejwe kwandika yafashwe ariko yandika anyuranije amazina yabaje kwiyandikisha. Hakwandika amazina asomye kuri karangamuntu yaca yandika ayandi.
Naho kwiyandikisha ku bazokwitaba amatora yimirije vyatanguye abanyagihugu bakirondera ikarata karangamuntu ari nayo isabwa kugira wandikwe baracayirondera kubwinshi hano mu gisagara ca Bujumbura.
Mu gihe ikarata karangamuntu igurwa amafaranga amajana atanu nkuko vyemezwa n’abasitanteri, haraho bariha igihumbi kugira uyironke. Abarongoye ama zone bagasigura ko ayo arengako arayo kuyandikisha.
•Ishirahamwe ry’abamenyeshamakuru batagira imbibe (Reporters Sans Frontières) rimenyesha ko ubutegetsi bw’intara ya Ruyigi butari bukwiye gufatira ibihano umumenyeshamakuru kubera yakoze inkuru itabushimije. Kubw’iryo shirahamwe ngo ni ingingo ihohotera umumenyeshamakuru, ikanabuza abanyagihugu ubwigenge bwo kuronka inkuru. Abamenyeshamakuru nabo ngo ni intumwa zisanzwe ntibajejwe gusambura.
Ivyo ishirahamwe ry’abamenyeshamakuru batagira imbibe RSF rikaba ribishikirije inyuma yaho kuruyu wa 3 Bulamatari w’intara ya Ruyigi aburije Jean Claude Nshimirimana umumenyeshamakuru akorera Radio Isanganiro gusubira gutanga amakuru yerekeye iyo ntara.
