•Umurwi w’igihugu wigenga ujejwe gutegura amatora CENI wemeza ko inyuma y’imisi 8 hatanguye igikorwa co kwandika abazoja mu matora y’ukwemeza canke guhakana ihinyanyurwa ry’ ibwirizwa nshingiro hamwe n’amatora yo mu 2020 abamaze kwiyandikisha bangana n’ibice 92,2 kw’ijana vyabo bari biteze. Umurwi CENI ukavuga ko ico gikorwa kizorangira kuruyu 6 igenekerezo rya 17 kuno kwezi nkuko vyari bitegekanijwe.
Naho umurwi CENI uvuga ko utazokwongera ikiringo co kwiyandikisha kubipfuza kuja mu matora, abanyagihugu baracarondera karangamuntu ku bwinshi kugirango bashobore kuja kwiyandikisha. Aho twaciye kuruyu wa 5 hano mu gisagara ca Bujumbura hari imirongo minini y’abarondera karangamuntu. Abo banyagihugu bagasaba ko imisi yo kwiyandikisha yokwongerezwa.
No muntara ya Gitega abanyagihugu barondera karangamuntu baracari benshi. Abanyagihugu baho i Gitega basaba umurwi CENI kwongereza ikiringo co kwiyandikisha
Mu runani rw’amashirahamwe aharanira agateka k’abana Fenadeb bemeza ko abanyeshule barenga 500 birukanywe ku mashule ngo ntibiyandikishije. Jacques Nshimirimana arongoye urwo runani akavuga ko bamaze kwirukanwa mu ntara za Rutana, Gitega, Kayanza na Bubanza. Agasaba abarongoye amashule gusubiza abana mw’ishule ngo kuko gutora ni ku bushake bw’umwe wese
•Ubushikiranganji bujejwe ubutungane bwatanguje kuruyu wa 5 mu ntara ya Ngozi igikorwa co kurekura abanyororo barabwa n’ikigongwe c’umukuru w’igihugu co kuwa 31 kigarama umwaka uheze. Mw’ibohero rikuru rya ngozi hakaba harekuwe abagabo 458 n’abakenyezi 60 hamwe n’abana 6. Umushikirizamanza kizigenza wa Républika Sylvestre Nyandwi yari yaserukiye umushikiranganji w’ubutungane murico gikorwa, yamenyesheje ko abanyororo barenga ibihumbi 2500 mu gihugu cose barimwo abakenyezi 165 n’abana 80 aribo bazoronka ikigongwe c’umukuru w’ igihugu. Agahamagarira abajejwe intwaro kuzokurikirana abazoba barekuwe.
Non Muntara Yangozi Commune Nyamurenza Bigenda Gut Munyifato?